Jismoniy faollik inson salomatligi va farovonligini taʼminlashda muhim rol oʻynaydi. Muntazam jismoniy mashqlar hayot sifatini oshiradi, surunkali kasalliklar rivojlanish xavfini kamaytiradi va hatto inson umrini uzaytiradi.

Miokinlar — sogʻlom turmush kaliti
Miokinlar — jismoniy mashqlar paytida mushaklardan ajraladigan oqsillar boʻlib, "mushak gormonlari" deb ham ataladi. Inson organizmida ularning qariyb 600 turi mavjud. Ular:

• yalligʻlanishni kamaytiradi;
• qonda glyukoza darajasini tartibga soladi;
• qon bosimini moʻtadillashtiradi;
• infeksiyalardan himoya qiladi;
• jarohatlardan tiklanishga yordam beradi;
• yogʻ hujayralarining parchalanishini tezlashtiradi;
• suyak toʻqimasini mustahkamlaydi;
• immunitetni oshiradi;
• qarish jarayonini sekinlashtiradi.

Jismoniy mashqlar paytida mushak tolalarida kichik mikroshikastlanishlar yuzaga keladi. Bu holat organizmga signal boʻlib xizmat qiladi va u miokinlarni koʻproq ishlab chiqara boshlaydi. Keyin esa ular qon orqali butun tanaga tarqalib, oʻz vazifasini bajaradi.