Жисмоний фаоллик инсон саломатлиги ва фаровонлигини таъминлашда муҳим роль ўйнайди. Мунтазам жисмоний машқлар ҳаёт сифатини оширади, сурункали касалликлар ривожланиш хавфини камайтиради ва ҳатто инсон умрини узайтиради.

Миокинлар — соғлом турмуш калити
Миокинлар — жисмоний машқлар пайтида мушаклардан ажраладиган оқсиллар бўлиб, "мушак гормонлари" деб ҳам аталади. Инсон организмида уларнинг қарийб 600 тури мавжуд. Улар:

• яллиғланишни камайтиради;

• қонда глюкоза даражасини тартибга солади;

• қон босимини мўътадиллаштиради;

• инфекциялардан ҳимоя қилади;

• жароҳатлардан тикланишга ёрдам беради;

• ёғ ҳужайраларининг парчаланишини тезлаштиради;

• суяк тўқимасини мустаҳкамлайди;

• иммунитетни оширади;

• қариш жараёнини секинлаштиради.

Жисмоний машқлар пайтида мушак толаларида кичик микрошикастланишлар юзага келади. Бу ҳолат организмга сигнал бўлиб хизмат қилади ва у миокинларни кўпроқ ишлаб чиқара бошлайди. Кейин эса улар қон орқали бутун танага тарқалиб, ўз вазифасини бажаради.